‘n Jaar van oorwinning en eenheid.

Ons gemeenskapsontwikkeling se temas was parallel met al die wêreldbeker toernooie van 2023. Merkwaardige vierings vir Suid-Afrika se netbal, sokker en nie te vergete die rugby nie! Ons het breë bors die oorwinnings gevier van ons twee deelnemers nl. Vivian Jacobs van Crispy Farming (Middelbestuur) en Luvo Nukani van Bronaar Plase (Junior Bestuur) by die 2023 Wes Kaapse Prestige Landboutoekennings. Sedert 2012 het ons streek nog nie weer die provinsiale Landbouwerker van die Jaar kompetisie gewen nie, en ons is ongelooflik trots op Vivian Jacobs wat hierdie titel gewen het!

Sokker

2550 spelers in 7 sones. Baie keer vergeet ons hoe groot die sokker is! Agter die skerms rook dit soms, maar dit het ‘n fenominale impak op die Xhosa/Sotho gemeenskap. In 2023 het ons21 skeidsregters opgelei, sokkerreëls opgeskerp en die jaar geeïndig op ‘n hoë noot toe Tandfontein gekroon was as kampioene van die Koue Bokkeveld Opleidingsentrum sokker-toernooi.

Ontwikkelingskampe

Verskeie plase se leerders en volwassenes kom bymekaar oor naweke om deel te neem aan ons kampe om hulle vaardighede en kapasiteit verder uit te bou. Met die aanvang van die kampe is almal vreemdelinge, maar teen die einde van die kampe het daar ‘n onbeskryflike eenheid en gehegtheid onder mekaar gevorm. Selfs na die kampe hoor ons hoe mense van ons streek mekaar ondersteun en hulp verleen.

Aantal persone bereik tydens projekte:

• Landbou-toekennings: 103
• Vrouedag: 471
• Mannedag: 455
• Jeugdag: 321
• Sokker spelers: 2550
• Jeug kampe: 85
• GOB’s opgelei: 51
• Musiek projek: 92
• Volwasse kampe: 93
• Die Proses: 72
• Tuinbou deelnemers: 18

Groot dae

Jeugdag, Mannedag en Vrouedag, ‘n dag van leer, bederf en lag. Hierdie groot dae is nog steeds gewild onder jonk en oud. In 2023 het ons veral gefokus op die gevolge van jou keuses as ‘n teenwoordige/afwesige ouer en hoe tieners die vele uitdagings in vandag se tyd kan aanpak en beter hanteer.