KBOS Januarie nuusbrief

*|MC:SUBJECT|*

KOUE BOKKEVELD OPLEIDINGSENTRUM NUUSBRIEF

HULLE BRING NIKS TERUG NIE

Ons hoor gereeld, veral by lewensvaardighede, kampe en GOB's, klagtes vanaf bestuur dat die betrokke leiers nie voldoende moeite maak met die “opheffing” van die res van die gemeenskap nie. Bestuur sien dan dikwels hierdie insette as ‘n swak belegging. Ons het ‘n groepie van hierdie mense ondervra en hier is hulle antwoorde:

Ek probeer self vorentoe gaan: Die individu se fokus is om weg te kom van iets na ‘n beter lewe vir homself. Hy wil elke geleentheid wat hy kan kry om “vorentoe” te gaan benut sodat hy self en sy onmiddellike mense kan vorentoe gaan. Dit is die doelwit. Dit is ook die doelwit wat hulle vir hulle kinders stel: “Hulle moet ‘n beter lewe hê as wat ek het.” Ander mense se sake is nie ‘n primêre doelwit nie.
Maak nie saak nie: Die leiers voel dat almal op die plaas die geleentheid gekry het om bv ‘n kamp by te woon, maar die ander mense het nie die moeite gemaak van die geleentheid gebruik te nie. Nou word die wat die geleentheid wel benut het “gestraf” deurdat bestuur van hulle verwag om terug te gaan na die wat nie wou gegaan het nie en die goeie boodskap wat by die kamp ontvang is, op hulle af te forseer. “Hulle het mos ook die kans gehad om te gaan. Hy wou nie.”
Gelykes: Dit is maklik vir bestuur om te kritiseer omdat hulle uit ‘n magsposisie praat. Die mense wat “opgehef” moet word is ons gelykes, ons familie, ons bure. Praat die bestuurder sy buurman of familie aan wat lelik is met hulle vrouens of te veel drink? Dit is nie so maklik nie en ‘n mens moet vir die regte geleentheid wag. Die buurman is onder geen verpligting om te luister nie.

Die antwoorde is presies wat ons sou verwag het. Wat is dan die gevolgtrekking?

Soos wat mense meer verseker voel in hulle “vorentoe” lewe en nie meer bang is dat hulle sal teruggeval nie, begin hulle oë meer oopgaan vir die probleme van ander. Mense kom tot ‘n punt waar daar emosionele energie beskikbaar is om elders te kyk as net jou eie persoonlike strewe. Mettertyd kan dit vir mense goed voel om te weet hulle maak ‘n verskil. Dit gebeur egter nie oornag nie en baie mense (van verskillende klasse en inkomste groepe) kom nooit by daardie punt nie.
Die kommentaar oor gelykes is baie billik. Wat is die mandaat wat die plaasleier het? Gee sy posisie op die plaas hom genoeg gesag? Baie min van ons sal net a.g.v. ons persoonlike mag ons buurman gaan aanspreek oor sy huwelik – al hoor ons hoe hy op sy vrou skree. Dalk as ons die ouderling is, sal ons posisionele mag ons daartoe dryf, maar daarsonder sal die meeste van ons nie veel meer doen as bid vir die stomme vrou nie.

OPKOMENDE KURSUSSE OM NA UIT TE SIEN

Die volgende kursusse vind volgende maand plaas:

Pluk kursusse
Vurkhyser nuwelinge en hertoetse

Om in te skryf vir die kursusse, of vir meer inligting, kontak asseblief vir Euria (euria@kbos.co.za).

2019 JEUGPROGRAM

Die volle program is op ons webwerf beskikbaar.

PROGRAM VERANDERINGE

Ons 2019 opleiding program is nou beskikbaar op ons webwerf, met n paar verbeteringe - naamlik Leadership for Hope wat Leadership for Hope Opvolg moet wees, teen R8450 per groep. Ons het ook die studente kategorieë opgesit, omdat dit belangrik is om die regte studente vir kursusse te stuur. Vir enige navrae, kontak asseblief vir Carmen of Samantha.

HR STUDIEGROEP: Let asseblief op dat die datum van die opkomende HR Studiegroep gaan verander tot einde Februarie. Sodra ons die nuwe datum het, sal ons vir almal laat weet. Die sessie gaan oor die evolusie van HR in die Agri industrie en vrae rondom Siza en Wieta, met spesiale gas Linda Lipparoni.

Onderwerpe vir die res van die jaar:
5 Junie: Dissipline, alkohol en produktiwiteit. Elke HR kan ‘n Produksiebestuurder saambring.
22 Augustus: Veiligheid en gesondheid in praktyk. Elke HR kan die bestuur verantwoordelik vir veiligheid saambring.
20 November: Behuising.

KETTINGSAAG: Ons het 'n datum gereël vir kettingsaag opleiding, aangesien daar baie navrae was. Die kursus gaan vanaf 17 tot 19 September 2019 plaas vind, in die Koue Bokkeveld.

KEUSE VIR VURKHYSER DRYWERS

Joy het as deel van die kwaliteitskontrole van kursusse die vurkhyser nuweling teorie bygewoon. Van die 6 studente was 4 wakker en ywerig, 1 onder standaard en 1 heeltemal hopeloos. Hy was in die eerste plek in die verkeerde taal klas want sy plaas het gedink hy kan Afrikaans praat, maar erger nog is hy basies ongeletterd. Vurkhyser opleiding is op NQF vlak 3, waar NQF 4 gelyk is aan graad 12. Hierdie man het graad 4. Die aanbieder was gaaf met die student en het hom probeer akkommodeer, maar ongelukkig het dit die hele kursus verongeluk.

Joy sê, “ek was lus en bel die plaas om die student te kom haal, of huis toe te neem. Dit is uiters onregverdig teenoor die ander en ook teenoor die dosent (wat in hierdie geval ook nog effens onervare was!).” Asseblief; moenie sommer vir enige ou ‘n vurkhyser of spuitpomp drywer maak nie, daar is vereistes aan die pos gekoppel.

VAN ONS LANDBOU DEPARTEMENT

2019 het begin met die Landbouleerlingskap klasse wat in volle swang is. Tans is die “uitdraai-syfer” minimaal in vergelyking met die vorige groep.

Die NQF 4 leerders het hulle eerste plaasbesoek aan Stargrow Kwekery afgelê. Die studente het baie vrae gevra en het die besoek baie leersaam gevind. Klasse is ook aangebied by Indigo Berries in Wellington. Dagklasse sal weer aangebied word vanaf mid- April.

Intussen het Atisang Sedidi by ons aangesluit en ons wens hom voorspoed toe in die landbou departement. Hy sal help met vertalings, optree as tolk tydens aanbiedings.

LEER ONS BETER KEN - OPE DAG
Die ideale geleentheid vir vrae oor befondsing, admin of jou plaas se toekomstige opleiding.