Welkom terug aan almal na die winter vakansie. Almal kan saamstem dat hierdie jaar 'n koue droë winter is. Die mis lê dik in die oggende en die luggie is ysig koud. Sit aan die ketel en maak vir jul 'n lekker warm koppie koffie en kom lees graag verder aan al die jongste nuus van die sentrum.  

In Junie het ons weer Jeugdag gevier. Die Afrikaanse Leiersdag was weer 'n opwindende dag. Volgende lê Vrouedag voor en ons sien uit om die dag weer saam met die vrouens te vier.
Dit is ook weer die tyd van die jaar wat altyd uitstaan as 'n groot hoogtepunt. Die Witzenberg Prestige Landboutoekennings. En wie is die wenner hierdie jaar? Lees die volledige nuus onder.

Die 2026 Witzenberg Prestige Landboutoekennings, wat op 30 Julie by Kaleo plaasgevind het, het erkenning gegee aan die mense wat die hart van die Witzenberg se landbousektor vorm. Met 118 deelnemers wat oor nege kategorieë meegeding het, is uitnemendheid, toewyding en professionaliteit opnuut gevier.
As koördineerder van die toekennings sedert 2003 is die Koue Bokkeveld Opleidingsentrum trots om deel te wees van 'n geleentheid wat mense se bydraes erken en inspireer. Ons bedank die Wes-Kaapse Departement van Landbou, wat die kompetisie dryf, asook Shoprite vir hul gesamentlike borgskap en ondersteuning.
Die aand het ook saamgeval met die 25-jarige viering van die Koue Bokkeveld Opleidingsentrum. 'n Mylpaal wat die belang van mense-ontwikkeling beklemtoon. Oor die afgelope 25 jaar het die sentrum duisende mense deur opleiding en vaardigheidsontwikkeling toegerus om met groter selfvertroue, kundigheid en leierskap 'n verskil in die landbousektor te maak.
In haar toespraak het uitvoerende hoof Carmen Roberts gesê dat die grootste sukses van landbou altyd by mense begin. Sy het hulde gebring aan produsente, vennote, aanbieders, personeel en veral die landbouwerkers wat elke dag die sektor vorentoe neem.
Baie geluk aan al die finaliste en wenners. 'n Spesiale gelukwensing aan Justin Baartman van Romansrivier (Graaff Fruit), wat as Witzenberg Landbouwerker van die Jaar 2026 aangewys is. Justin se reis van algemene werker tot middelbestuur is 'n inspirerende bewys dat toewyding, harde werk en voortdurende ontwikkeling beloon word.
Met 25 jaar se ervaring bly die Koue Bokkeveld Opleidingsentrum trots daarop om saam met sy vennote in mense te belê en só by te dra tot 'n sterker landbousektor.

Vir volledige lys van wenners druk op die skakel. Hiermee ook die skakel van 25 jaar tydlyn.

Terwyl julle nog wonder wat Vrouedag hierdie jaar gaan inhou, werk ons reeds hard agter die skerms om vir julle ’n dag vol inspirasie, lag, musiek en betekenisvolle oomblikke saam te stel. Ontmoet ons sprekers:
Haidee Muller-Isaacs is ’n bekende radiopersoonlikheid by RSG, dokumentêre vervaardiger en storieverteller met ’n passie vir mense en hul unieke lewensverhale. Ná ’n suksesvolle loopbaan as joernalis by Huisgenoot het sy haar hart in die radiowêreld gevind, waar sy luisteraars inspireer deur die stories van gewone mense op buitengewone maniere te vertel.
Shirley Olivier van die Suid-Oosterfees is bekend vir haar betrokkenheid by een van die Wes-Kaap se voorste kunstefeeste en haar passie om mense deur kuns, kultuur en gemeenskapsprojekte bymekaar te bring.
Akhona Vuta sluit ook by ons aan en gesels oor die belangrikheid van selfsorg, hoe dit hand aan hand gaan met stresbestuur, en die invloed daarvan op effektiewe ouerskap.
Bring jou vriendinne, kollegas, ma, dogter of suster saam en maak gereed vir ’n dag om te onthou. Kontak vir Landi by landi@kbos.co.za om in te skryf.

Met die eerste helfte van die jaar suksesvol agter die rug, het die personeel van die Sentrum tydens 'n spanbou-sessie saamgekom om terug te kyk, te besin en vooruit te beplan. Onder die tema “Cultivating High Performance Teams: Align and Attune to Accelerate”, het ons gefokus op die bou van sterk, doelgerigte spanne wat gereed is om saam te groei en uitnemendheid na te streef. Die dag het waardevolle gesprekke, beplanning en die verfyning van operasionele planne ingesluit om ons werksaamhede verder te versterk vir die opleidingseisoen wat ná die vakansie voorlê.