En ons Witzenberg Landbouwerker van die jaar 2023 is...Vivian Jakobs van Crispy Farming! Baie geluk!! Hierdie glansgeleentheid het op die 27ste Julie te Kaleo plaasgevind. Sprekers Gertrude Jacobs van Departement van Landbou, en Christi van den Heever, Jongboer van die Jaar 2023, het die deelnemers toegespreek oor die belangrike rol/skakel wat landbouwerkers in die boerdery ketting speel, sowel as hul bydrae tot die sukses van boerdery. Dit het so goed ingepas by vanjaar se tema; Van hand na Mond.

Op 15 Junie het lorries vol toegewyde jeug leerders ons Jeugdag bygewoon. Al die plase het opgedaag, ongeag die slegte toestand van die paaie en swak selfoon netwerk a.g.v. die week se storms/onweer. BAIE DANKIE AAN ELKEEN WAT DIT MOONTLIK GEMAAK HET. Ons kan met trots sê dat die dag 'n reuse sukses was.

Die aanbieders se aanbiedinge was interaktief, lewenslustig en leersaam. Ons hoor by die plase dat die kinders nie kan ophou praat hoe goed die boodskappe was wat hulle ontvang het nie. Dankie ook aan ons leerders. Hulle gedrag was puik en ons is trots op hulle!

Wel - nie regtig so nuut nie! Die “plaasbesoeke” gaan ‘n nuwe naam en baadjie kry. In essensie is die plaasbesoeke die plase se geleentheid om met die personeel van Koue Bokkeveld Opleidingsentrum te gesels (individueel of in ‘n groep), oor ‘n onderwerp van die plaas se keuse. Vanuit die plase se perspektief is dit dus ‘n konsultasie sessie. Vanuit die opleidingsentrum se perspektief wel ‘n plaasbesoek. Hierdie gesprekke; ongeag wat hulle genoem word, is noodsaaklik om plase te help om die beste moontlike gebruik van die Koue Bokkeveld Opleidingsentrum se dienste te maak deur hulle unieke omstandighede en die manier wat hulle die dienste wil aanwend te bespreek met die personeellid van hulle keuse. Dit is gratis vir alle ledeplase en deel van die voordele van hul lidmaatskap. Vir die opleidingsentrum is hierdie besoeke ‘n krities belangrike diens, want dit is waar die realiteite van die plase bespreek word en nuwe opleidingsidees gegenereer word. Dit is ‘n noodsaaklike “reality check” om te verseker die opleidingsentrum se dienste bly relevant.

Sommige plase is baie kreatief met die benutting van hulle konsultasie geleenthede. Sommige gebruik dit vir die opvolg van kursusse. Ander gebruik dit om spesifieke kursusse se impak te evalueer. Sommige gebruik dit om toekomstige studente of jeug met potensiaal te help identifiseer.
Izak Groenewald van Lakenvlei het die volgende gesê van hul navorsingsgesprek: "Belangrikste boodskap vir ons besigheid was verseker die feit dat verhoudings met ons mense eerder as net stelsels baie belangrik is. Te alle tye moet besluite opgeweeg word, tussen kwaliteit en kwantiteit. Ons arbeid kom van vêr en is die span sy familie!! Verseker die regte onderwerp vir ons, en fantasties deur Joy gelei om die invalshoek en klem op produktiwiteit, nuwe betekenis te gee”.  

Elke plaas is geregtig op 3 ure se konsultasie diens. Dit bly die plaas se keuse wie om te betrek by die konsultasie. As die HR (menslike hulpbronne bestuurder) net wil koffie drink met die persoon van die opleidingsentrum is dit ook reg! As daar met ‘n groep werkers of ‘n komitee gesels moet word, is dit ook reg; MAAR onthou - dit is slegs 3 ure gratis en dis te min om ‘n hele opleidingsessie aan te bied.  Plase kan wel opleiding wat aangepas is vir die plaas aanvra, maar sal dan waarskynlik ‘n paar uur teen betaalde konsultasie tarief moet byvoeg. Dit is egter nie primêr bedoel vir opleiding nie, maar eerder vir toepassing of opvolg van bestaande opleiding of dienste.

Daar is ook wel plase wat nie hulle konsultasie ure benut nie en dan outomaties na navorsing verwys word. Daar is ‘n paar navorsingsonderwerpe om van te kies. Joy is ingekontrakteer om die navorsing te doen. Sy kom basies dan ‘n klomp vrae vra en aan die einde van die jaar sal sy ‘n verslag optrek vir die opleidingsentrum om die tendense aan te dui, sodat strategiese besluite geneem kan word. In die geval kom die vrae dus van die opleidingsentrum se kant af. 

Dit bly vir ons belangrik om in voeling te kan bly met plaas realiteite as die opleidingsentrum se personeel gereeld op die plase kom. Die konsultasiediens (wat deel van die ledevoordele uitmaak) is dus ‘n wen-wen.

Onder volg 'n voorbeeld van wat 'n plaas met hul tyd gedoen het.

Baie geluk Joy! Onder volg 'n uittreksel uit die artikel en motivering vir die toekenning. 

Die 1662-toekenning herdenk die eerste twee appels wat in daardie jaar - 17 April om presies te wees - in die Kompanjiestuin aan die Kaap geoes is.
Joy van Biljon, een van die stigterslede van die Koue Bokkeveld Opleidingsentrum, ook bekend as KBOS, het 'n visie gehad om landbou deur opleiding te verander. Oor etlike jare heen, het Joy van Biljon 'n deurslaggewende rol gespeel om opleiding in die kommersiële sektor so te posisioneer dat dit ekonomies sin maak en diegene bemagtig wat opgelei word vir 'n loopbaan in die landbou. 
Joy het ook 'n belangrike rol gespeel om die sagtevrugtebedryf te help, en spesifiek om Hortgro te adviseer en by te staan, om die opleidings- en ontwikkelingsafdeling te onderhou.