Januarie 2023_Koue Bokkeveld Opleidingsentrum_Nuusbrief

*|MC:SUBJECT|*

KOUE BOKKEVELD OPLEIDINGSENTRUM

"BACK TO SCHOOL. BACK TO REALITY"

Welkom terug! Ons staan alweer aan die einde van Januarie en almal is weer terug op hul poste. Ons hoop dat 2023 'n besonderse jaar sal wees met vele hoogtepunte en suksesverhale.
Koue Bokkeveld Opleidingsentrum poog weereens om studente te help leer en presteer. Mag ons elke persoon, van jonk tot oud, waarmee ons in aanraking kom hierdie jaar, iets leer en positief beïnvloed, sodat hul die beste weergawes van hulself kan wees.
Lees meer onder oor die lekker dinge wat plaasgevind het sowel as ander belangrike inligting rakende opleiding.

GR.7'S SLUIT AF MET 'N OPVOEDKUNDIGE KAMP

Die Gr.7 - leerders het in Desember, die 2022-jaar afgesluit met 'n lekker kamp by Dennebos. Die genot wat die leerders vir die omgewingsessie gehad het, het veral uitgestaan. Dit het bestaan uit baie lekker opwindende aktiwiteite en die leerders het sommer ‘n liefde en waardering vir die natuur ontwikkel. Om hulle voor te berei vir hoërskool, is daar baie gefokus op christelike waardes en die Sondag het ons afgesluit met die onderwerp, "keuses". Daar was goeie deelname getoon, veral met groepbesprekings.

Die leerders het omtrent die plase bedank vir die finansiële bydraes om te gaan kamp. Ons woon werklik in ‘n omgee-streek. Baie dankie hiervoor.

GOB KAMP

Die GOB's het die naweek van 20-22 Januarie by Boontjiesrivier gaan kamp. Daar was 'n groot groep van 48 GOB’s en Landi en Joseph van die Koue Bokkeveld Opleidingsentrum het saam met hul die kamp bygewoon. Die GOB's het geleer om 'n "lighuis" leier te wees, tydens Rene Arendse se werkswinkel. Dit behels om ver vooruit te kan sien, gevaar te kan uitwys, die gemeenskap na veiligheid te lei en eienskappe van standvastigheid, konsekwentheid en stabiliteit te toon. Die GOB's het baie geleer, lekker saam gekuier en goed deelgeneem aan spanbou aktiwiteite.

11 PROSES LEIERSKAPONTWIKKELING KAMP

Brett Viljoen en sy span van Kunika Outdoors het 'n ongelooflike leersame kamp vir die leerders van Ceres Sekondêr, Iingcinga Zethu en Charlie Hofmeyer aangebied.
Baie verskillende leierskapsaspekte is met kreatiewe ervaringsleermetodes geleer. Die leerders het skuilings gebou, potjiekos gemaak en teen die berg opgestap. Belangrike lesse is geleer, soos om die regte fondasie te hê wanneer daar storms/moeilike tye oor jou pad kom, hoe om jou verantwoordelikhede na te kom, wat die doel van die mensdom is, en hoe ongelooflik mooi die skoonheid van die natuur is wanneer daarna omgesien word.

LEDEGELD

Ons pas ons ledegeld formule aan deur die gedeelte, wat gebaseer is op die plase se SDL, te verminder van 15% na 13%. Met die verhoging in die loonrekeninge en daarmee saam die SDL, voel ons die aanpassing is nodig om onrealistiese styging in die ledegeld te voorkom. Ons gee graag die voordeel aan die plase deur en hoop dit sal spandeer word aan vaardigheidsopleiding.

Daar is ook besluit om plase wat meer as 50% van hulle SDL by die Koue Bokkeveld Opleidingsentrum spandeer in ‘n gegewe jaar, ‘n verdere klein afslag te gee op die ledegeld in die daaropvolgende jaar. Daarmee wil ons graag erkenning gee vir die plase wat ons getrou ondersteun.

Ons kan nog nie die plase se finale SDL syfers sien op die AgriSETA stelsel nie, maar sal sodra ons kan, aan jul ‘n e-pos stuur wat die implikasies van bogenoemde goeie nuus vir jou plaas verduidelik. Ons sal dit ook tydens ons plaasbesoeke aan almal verduidelik.

LANDBOU-DEPARTEMENT NUUS

Die NQF 1 landbouleerlingskappe wat in 2021 begin het, het klaargemaak in Oktober 2022, en is reeds in Desember gemodereer. 'n Groep van 31 leerders het die NQF 1 kursus suksesvol voltooi.

Die NQF 4 klasse gaan voort soos beplan en sal in Mei 2023 klaarmaak.

Die studente van die QCTO-klas in Tulbagh toon goeie vordering en almal is baie beïndruk. Ons het nog ‘n ver pad om te stap tot voltooiing van hierdie kursus, maar ons is hoopvol oor die pad vorentoe. Anida de Villiers van Anida Training het gedurende Desember klasse aangebied wat die studente baie opgewonde gemaak het en wat hulle baie geniet het.

Kontak gerus vir Jacob by jacob@kbos.co.za vir meer inligting en navrae oor leerlingskappe.

AGRISETA AANSOEKE

Die aansoeke wat ingedien is vir beurse, internskappe en werkplekplasing, is gedurende Desember ge-evalueer en die plase wat goedkeuring gekry het is in kennis gestel. Geen nuwe beurse en internskappe is goedgekeur nie. Goedkeuring vir slegs 2 werkplekplasings en beurse van studente wat verlede jaar ook befonds was, is goedgekeur. Die rede wat die Seta aanvoer, is dat die aansoeke die beskikbare begroting oorskry het. Hierdie is baie sleg vir ons streek. Ons het ons bekommernis hieroor aan die bestuurder van die leer programme en projekte wat internskappe, werkplekplasings en beurse insluit, uitgelig. Tot op hede het ons nog geen terugvoering ontvang nie.

Ons sal teen einde Maart of vroeg April terugvoering kry oor die aansoeke vir leerlingskappe en vaardigheidsprogramme. Ons hou moed dat dit goeie nuus sal bring aan ons lede plase.

BESOEK EN BESPREEK - SKRYF GOU IN!

BROKKIES:

1. Bemarkingsbesoeke: Ons kom weer kuier. Hou gerus jul e-posse dop en dagboeke oop vir ‘n afspraak vanaf Carmen of Ané. Ons besef dit is ‘n baie besige tyd, maar dit is ook die beste tyd vir ons om met jul te kom gesels oor wat ons beplan in die 2023 Opleidingsjaarprogram.

2. 2023 Opleidingsjaarprogram: Moenie vergeet om te boek/bespreek vir jul kursusse nie. Besprekings kan gemaak word op ons webwerf en die jaarprogram kan ook afgelaai word op ons webwerf. Vir enige navrae, kontak gerus vir Euria by euria@kbos.co.za.

3. Sokker: Vir enige navrae oor die sokker-liga, kontak gerus vir Joseph by joseph@kbos.co.za.

Want to change how you receive these emails?
You can update your preferences or unsubscribe from this list.