OPLEIDINGSENTRUM VOEG E-LEER BY: VENNOOTSKAP MET AGRICOLLEGES INTERNATIONAL IN PLEK

In ons 2018/2019 jaarblad het ons genoem dat die Koue Bokkeveld Opleidingsentrum al hoe meer in die rigting van e-leer wil beweeg. Ons eerste e-leer klasse het in Julie van 2020 afgeskop. Hierdie stap is nie net sodat ons die voortou met innovering en ontwikkeling in terme van die aanbied van kursusmateriaal kan neem nie, maar ook omdat dit 'n oplossing bied vir leerlingskappe wat in 'n korter tyd aangebied moet word, sonder dat praktiese seisoenale aspekte uitgesny word.

Natuurlik het die Covid-19 pandemie ook duidelik uitgewys dat e-leer as element van ons aanbieding absoluut noodsaaklik is. Dit vestig 'n model van vermengde leer wat ons studente baat.

Nadat AgriColleges International (AgriSETA geakkrediteerd) ons in 2018 besoek het en ons weer in 2019 besoek by hulle afgelê het, is die vennootskap onlangs met 'n Memorandum van Ooreenkoms gesluit waar hulle twee modules (landbou-besigheidsbestuur en kommunikasie) vir ons op e-leer basis sal aanbied.

AgriColleges International het beslis al hulself op die gebied van e-leer bewys en bied dieselfde kwalifikasies as ons, maar daarby bied hulle ook NQF-vlak 5 kwalifikasies vir studente. Dit is iets waarna ons in die toekoms mik en ons kan baie uit dié vennootskap leer.

Ons is opgewonde oor die samewerking en wat dit vir die sentrum beteken.

Die Opleidingsentrum het ook sopas ons eerste Noodhulpkursus met e-leer elemente afgehandel. Ons was reeds voor Covid-19 grendeltyd gerat om dié kursus aan te bied, maar moes eers bietjie uitstel. Dit was 'n groot sukses en het positiewe terugvoer ontvang.

Ander kort kursusse waar e-leer deel van kursusaanbieding uitmaak:

Veilige hantering van gifstowwe (heropleiding);
Basiese beginsels van toesighouding;
KID (vermengde leer).

Ons het aan die begin wel navrae vanaf ons kliënte ontvang oor toegang tot rekenaars en wie die data sou voorsien. Die aanvanklike reaksie het nogal breed verskil, maar ons het die geleentheid tydens die inperkingstyd aangegryp om ons ledeplase te skakel en e-leer, as deel van vermengde leer, met hul deur te trap.

VROUEDAG IN PRAG EN PRAAL GEVIER

Die vroue van die Witzenberg-streek het Vrouedag in styl gevier. Verskeie plase het van ons pakket gebruik gemaak en die vroue wat op die plase woon en werk bedien met 'n opgeneemde praatjie van ons spreker. Ons hoop elke vrou is bederf en dat dit ’n herinnering is aan hoe ver vroue al in Suid-Afrika gevorder het. Plase wat steeds in September nog die dag wil aanbied kan vir ons kontak. Die pakket is teen R500 beskikbaar.

MENSLIKE HULPBRONBESTUUR-WERKSWINKEL BY WAVERLEY HILLS GEE GOEIE WENKE VIR DISSIPLINÊRE VERHORE

Op 28 Augustus 2020 het 17 deelnemers die werkswinkel bygewoon waar sprekers Wynand Viljoen en Johan de Kock interaktiewe en insiggewende sessies aangebied het.

Michelle Le Roux is aangestel as die Opleidingsentrum se nuwe administratiewe- en bemarkingsbeampte. Sy begin 14 September 2020.

TWEE MANNEDAG-SPREKERS REEDS BEVESTIG

Ná die groot sukses van die Vrouedag-pakket, gaan ons dieselfde roete loop met Mannedag wat 3 Oktober sou plaasvind. Ons het reeds twee sprekers in plek wat hul praatjies elektronies stuur om op die geheuestokkie te sit. As addisionele sprekers bykom, sal ons die nuus versprei.

Die plaas ontvang die geheuestokkie met die video’s op. Julle kan selfs ook reël om na die tyd gesellig saam te braai. Ons weet julle wil graag saam met ander plase kuier en daarom beveel ons aan dat twee plase saam groepeer om die dag te geniet en sodoende binne die 50-getal beperking beperking te bly.

Die kostes is R500 vir die pakket.

Albertus Davids van ATKV is 'n bekende rieldans-sanger wat die gehoor vermaak met geskiedkundige en grapperige stories.

Premier Alan Winde bedank landbouwerkers vir hulle harde werk tydens grendeltyd. Sy boodskap is motiverend en positief opbouend.

KONTAK LANDI OM PAKKET TE KOOP

JEUGPROGRAMME WEER VOLSTOOM AAN DIE GANG

KORTLIKS

KURSUSSE WAT STEEDS PLEK OOP HET:
- Kleuterverfrissing – 10 September: Koue Bokkeveld Opleidingsentrum
- Besproeiing vir voormanne – 10 September: Ceres Museum
- Gee van opdragte – 11 September: Koue Bokkeveld Opleidingsentrum
- Besproeiing vir algemene werkers – 11 September: Ceres Museum
- Basiese Auto Elektries – 14-18 September: Villa Verster
- Toesighouer Kwaliteit – 14+15 September: Koue Bokkeveld Opleidingsentum
- Boomkursus - 17+25 September: Koue Bokkeveld Opleidingsentrum
- Besproeiing vir algemene werkers – 17 September: Koue Bokkeveld Opleidingsentrum
- Besproeiing vir algemene werkers – 18 September: Koue Bokkeveld Opleidingsentrum
- Effektiewe Leiersbeplanning – 29 September: Ceres Museum
- Senior Struikelblokke – 6 Oktober: Choose life centre
- Meganiese toetsing – 8 Oktober: Koue Bokkeveld Opleidingsentrum
- Groente monitors – 9 Oktober: Koue Bokkeveld Opleidingsentrum
- Veiligheid en gesondheidsverteenwoordigers – 13 en 14 Oktober: Koue Bokkeveld Opleidingsentrum
- Groente monitors (Xhosa) – 16 Oktober: Koue Bokkeveld Opleidingsentrum
- Basiese beginsels van toesighouding – 27+28 Oktober: Koue Bokkeveld Opleidingsentrum

NASORGDIENSTE, -HULP, -ONDERSTEUNING
- Ons besef nasorgsentrums gaan nou nog meer van ’n noodsaaklikheid as ooit vantevore wees. Die leerders gaan ekstra ondersteuning nodig hê. Dit gaan veral baie selfdissipline van die leerders verg om hulle skooljaar te voltooi. Landi kan help met die motivering van die leerders, aanbied van programme, ekstra hulp en ondersteuning. Sy is een middag per week beskikbaar indien ’n plaas wil inkoop vir nasorgdienste. Kontak asb. vir Edna om meer uit te vind en julle spesifieke behoeftes te bespreek.

BESOEK ONS WEBBLAD VIR OPLEIDINGSGELEENTHEDE

Want to change how you receive these emails?
You can update your preferences or unsubscribe from this list.